صديقتي صاحبة التجربة المشابهة،
لم تصلني منك رسائل بأسئلة محددة لذا فإليك بعض النصائح.
* ذاكري..
إذا كانت إنجليزيتك جيدة أو متوسطة أنصحك باقتناء هذا الكتاب، ويمكنك مراسلة المؤسسة إذا كانت لديك أية أسئلة.. جربت كتب متعددة لكن ذلك كان الألطف والأكثر واقعية
Twins & Multiple Births: The Essential Parenting Guide from Pregnancy to Adulthood
لينك أمازون: https://www.amazon.com/Twins-Multiple-Births-Essential-Parenting/dp/0091894859
* تعرفي على احتياجات النوم لأبنائك مع تطور نموهم.. ده أكثر شيء هيخليك قادرة تنظمي حياتك
الموقع ده بيديك احتياجات النوم شهر بشهر.. وكمان بيقترح عليك الجداول الممكنة مع تطور كل شهر
ده لينك احتياجات أول 6 أسابيع: http://www.babysleepsite.com/newborns/how-do-0-1-2-3-4-5-6-week-olds-sleep/
* اعرفي أنسب طريقة لتنظيم الرضاعة
البيبي لما يعيط مش دايمًا بيكون جعان، فمش كل ما يعيط ترضعي.. خصوصًا مع التوأم – وخصوصًا لو هيرضعوا صناعي – لأنه بيتولدوا صغيرين وبطنهم بتكون صغيرة جدًا أصغر من العادي.. الرضاعة المتكررة ممكن تسبب مغص أو إمساك + لو رضاعة طبيعية وانت مش عاملة “ريكورد” من الي بتاكليه.. ممكن تعمل اي رد فعل متكونيش عاملة حسابه..
الرضاعة الطبيعي في البداية بتكون ما بين ساعتين – ثلاث ساعات، لو البيبي نام اكثر من ساعتين ونصف صحيه أكليه ونيميه تاني
لو اتبعت النظام ده.. بتبدأي بعد الشهرين تباعدي بين الرضعات لحد ما يوصلوا ٣ ساعات او ٣ ونصف وبعد اربع شهور كل اربع ساعات وبعد ٦ بتبدأي تدخلي أكل صلب في وجبات ثابتة بيبقى الموضوع أخف
الرضاعة الصناعي بيبقى أول فترة 30 ملل كل ٣ ساعات..بعدين بتبدأي تزودي ٦٠ – ٩٠ … في اخر اسبوع من اول شهر البيبي بيكون بياخد 120 ملل كل ٣ ساعات
بعد كده بتتابعي مع الدكتور ومع الإرشادات المكتوبة على العلبة وبتقسمي عدد الرضعات على عدد ساعات اليوم وبتعرفي الفرق بين كل رضعه ورضعه
على 5 أشهر مثلًا ممكن يبدأوا يسحبوا في النوم ويفوتوا رضعات بالليل.. وفي حالات بيحصل معاها بدري عن كده.. فده حاجة صحية مش وحشة..
## خلي بالك أنه ممكن علشان معدتهم يحتاجوا لبن صناعي أخف من اللي الأطفال التانين بياخدوه، أنواع أخف مش كميات أخف.. اسألي الدكتور لو لاحظتي إمساك صعب أو وجع باين
* المغص.. بيحصل.. وطبيعي ومؤلم.. بس هيعدي
خبرات الأمهات حواليك في مقاومة المغص هتساعدك، نصيحة الدكتور – أنا مش عارفة انت في انهي بلد.. فمقدرش اديك نصايح قد كده- بس الثابت والي كلنا متفقين عليه تقريبا أنه تمرينات البطن بتريح الأولاد، ولو ناموا على بطنهم جنبك وتحت نظرك بس مش بالليل ومش بعيد عنك
* swaddling لف البيبي على طريقة الشرنقة بيسهل عليهم النوم
لما يكبروا سنة بيبدأوا يطلعوا يدهم برة الشرنقة دي وبيبقى شكلهم يضحك 😀
الفيديو ده هيعرفك إزاي تلفيهم: https://www.youtube.com/watch?v=lQWWxWMLt-M
[youtube https://www.youtube.com/watch?v=lQWWxWMLt-M?ecver=1&w=560&h=315]
* حاجة لازم تفكري فيها وتتشاوري فيها مع زوجك.. هتنيموهم فين وازاي.. اقري عن الفوايد و(عكس كلمة فوايد) بتاعة انه يناموا معاك co-bedding أو انهم يناموا مستقلين في سراير (أو غرفة) تانية… بالنسبة لتجربتي أنا الأفضل بعد سن الشهرين / ٣ شهور يناموا في غرفة منفصلة.. علشان يعرفوا يناموا نوم منتظم شوية بالليل.. سواء علشان تنامي أو حتى تاخدي وقت لنفسك
* في حاجات أظن هيكون من المفيد تقري فيها أو تبحثي عنها على يوتيوب: نوعيات النوم (في نوم خفيف / نوم عميق / نوم بأحلام وخلافه)، تطور حواس الطفل النظر، السمع الخ، الألعاب المناسبة لكل فترة عمرية، الألعاب الي ممكن تناسب أكتر من فترة عمرية، الاألعاب الي بتنمي الحواس، الألعاب الي فيها مشاركة بينك وبين طفلك.. بين أطفالك وبعض؛ وأخيرًا.. أهمية أنك تتكلمي مع طفلك من أول يوم (ومن وقت وانت حامل كمان)
* حاجة من الحاجات الي ساعدتي أول فترة هي اني كنت حريصة أسمع من السابع تراكات معينة (قرآن / أغاني / موسيقى) ثابتة بحيث يبقو عارفينها لما يتولدوا، وفي أول فترة ثبتت تراكات معينة للنوم خلال النهار، وتراكات لوقت النوم بالليل.. وهما تعاملوا معاها بشكل لطيف..
* معلومة: العيال مبترفضش التتينة / اللهاية / pacifier هما مبيعرفوش يمسكوها ببقهم فبتقع منهم كل شوية.. مع الوقت بيتعودوا
*معلومة 2: AVENT أحسن ماركة للببرونات / التتينات / ملاعق الطعم / pumpers / expressed milk containers or bags
منتجات أڤنت تصميمها وخامتها بتكون معلنة على موقعها؛ هتلاقي هنا مثلًا تفاصيل تصميم التتينة بحيث أنها تبقى بتساعد على تنفس جيد ومبتتعارض مع نمو صحي لللثة والفك والأسنان
http://www.usa.philips.com/c-m-mo/pacifiers
* تجربتي مع التتينة أنها تكون للنوم.. شيء يساعدهم على النعاس وعلى إعادة النوم مرة تانية لو قلقوا soother .. مش بتطلع برة السرير، إلا لو خارجين برة البيت ومتوقع يناموا أو يزهقوا.. طول ما هما صاحيين ولا كأنها موجودة.
* معرفش أنت عايشة في بلد فيها أصدقائك / أهلك / والدتك ووالدة زوجك، ولا مغتربة وانت وزوجك لوحدكم والمسافات بينكم وبين صحابكم قريبة / بعيدة.. بس أيًا كان المحيط بتاعك… حاولي تجتهدي تاخدي وقت لنفسك كل فترة.. روحي الكوافير.. have a bubble bath.. اقري كتاب.. اخرجي مع اصحابك.. اخرجي لوحدك.. نفسيتك وصحتك أكبر راس مال لك ولأسرتك الصغيرة ولنفسية ولادك..
* مضاد السرحان.. هتكون المواقع الي بتديك ملخص أسبوعي عن النمو.. مش شرط يكون مفصل ولا حتى في منتهى الدقة.. بس بيكون زي تذكير كده انه عدينا المرحلة دي.. رايحين المرحلة الجاية..
www.babycenter.com/
هيؤدي المهمة دي بكل سعادة.. كمان فيه مجموعات للتوأم من أمهات حول العالم ممكن تسأليهم على أي حاجة لو محتاجة تجارب ناس تانية.. وممكن بس تدخلي تقرأي كل فترة.. بيديك إحساس لطيف بمعنى الرعاية الي بنقدمها لأطفالنا وأهميتها في حاجات بسيطة جدًا زي انك لما ترفعيهم يدبدبواا في الهواء، أو قد ايه هيبقى ممتع تشوفيهم بيتقلبوا لوحدهم.. وهكذا
* في حاجة كمان: التوأم بيتولدوا صغيرين: قصيرين وخفاف عن الأطفال العاديين.. لو حسيتي انه كلام الناس زي “دول صغيرين أوي” أو “ايه ده هما مش بيكبروا” أو اي كلام من اللطيف بتاع مجتمعنا – بيضايقك.. قولي للناس أنك بتضايقي ومش عايزة تسمعي التعليقات دي تاني. مع شكر لطيف وابتسامة هادية.
* آخر حاجة.. دي نصيحة عادة بقولها للناس الي اعرفها على جنب.. لكن دي مساحة لطيفة انها تتقال للكل.. الناس هتجيب لك هدايا؛ الهدايا ممكن تكون متكررة أو ضخمة أو حاجة انت محتاجاها بس مش النوع / الخامة الي عايزاه.. مع توأم الحاجة بتبقى 2 وبتاخد مكان كبير؛
اعملي registry أونلاين لو علاقتك مع الدواير الي حواليك تسمح بده… يبقو عارفين ايه ناقصكم ايه محتاجينه بحيث محدش يجيب حاجة مش محتاجاها.. أو إذا علاقتك متسمحش؛ حددوا المحلات الي حابين تجيبوا لأطفالكم ووضحوا أنه إذا حد مش عارف انتوا محتاجين ايه وعايز يجيب هدية ممكن يجيب لكم gift card بأي قيمة من المحلات الي تحبوها.. هيفرق معاك كتير
– ده موقع ريجستري للأطفال ممكن تتعرفي من خلاله ع الفكرة: https://www.babylist.com/why-babylist
– صورة للـ gift card
دي أكثر حاجات في بالي حاليًا أتمنى تساعدك.. لو عندك / لو أي حد عنده أي أسئلة في حاجة أقدر أساعد بيها يكتب في الكومنتات (لو لسة حابة تحافظي على سرية هويتك ابعثيلي على صراحة تاني وأنا هكتب الرد في الكومنت على البوست ده.. اللينك: https://asmaaazma.sarahah.com/)
الأطفال وتنشأتهم تجربة جميلة.. صعبة ومرهقة.. بس جميلة.. مليانة تغيير ونمو وسعادة.. استمتعي بيها.. استمتعوا بيها سوا انت وزوجك.. وكونوا بيت مبسوط
بالتوفيق يا طيبة 🙂
** تلقيت رسالة عبر موقع صراحة تسأل عن بعض النصائح في تنشئة التوأم وهذه هي
لينك البوست على فايسبوك: https://goo.gl/tuRB14
