نكسافيه هذه الأيام

لو حبيت أعمل لنفسي كوباية نسكافيه الأيام دي الموضوع بيحتاج مجهود كبير جدًا، وبلا مبالغة أقدر أوصفه أنه عبئ نفسي خانق.

بداية، مينفعش بالكرسي.. فقدامي حل من اثنين.. يا أروح للمطبخ بعكازين واسيب واحد هناك.. يا اروح للمطبخ وأنا بتسند ع الحيطان.. وأنا عارفة أنه خالد هيضايق لو شافني.. والدكتور هيلطم لو عرف..

المشكلة أنه مع رعب الوقفة في المطبخ الي أنا وقعت فيه بدل المرة، 3 و 4  قبل كده.. أنا هتعامل مع مياه.. وساخنة كمان.. وهضطر أتحرك كذا حركة.. وبعدين هاخد الكوب وادخل به أوضتي…

في الطريق أنا تحت رحمة يد واحدة.. عكاز واحد أو سند ع حيطة واحدة.. وفي كل الحالات هوصل الاوضة بنصف كوب نسكافيه.. بس مينفعش بالكرسي برضه علشان أنا بلبس بمعاناة ومعنديش استعداد لبسي يتبل فاضطر أغير..

بس المعضلة كلها أنه الأرق بيطالب بشوية قهوة.. لأنه الألم مش بيروح بمسكن والنوم مش راضي يجي..

أسوء شيء بقى في طول الليل ولما يطول عليك لوحدك أنك بتفكر كتير.. وبتفتكر كتير..

مثلا النهاردة عمالة أفتكر حماس الخطوبة وأنا بحكي لخالد عن بيوت بعشقها لأنها مفتوحة وقلوب أصحابها مفتوحة للناس..

وحكاويا أنه ازاي نفسي بيتنا يكون قبلة للعالمين ويكون خيره للناس.. وأنه الناس تلاقي في بيتنا راحة ومودة وتحب تزورنا علشان بيتنا دافئ..

وعمالة بفكر في لحظات كتيرة قريبة وبعيدة ومدى التقوقع الي المجتمع عايزك توصله.. يا إلا تقبله على سوءاته ووقاحته وبجاحته يا إلا تنعزل..

وعمالة بفكر بألم في بيت مفتقداه في بلد بعيدة وأنه ازاي الواحد كان ممكن يروح هناك ويحس أنه بيته ويتكأ بظهره على الكنبة ويبقى عارف أنه الشخص الوحيد الي بيتعمل له قهوة بدون سكر.. وعارف أنه على اختلافه مقبول ومحبوب

أنه شتان بين المجتمعات..

شتان شتان..

عمالة بفكر وأنا روحي بتأن في كمية الاعتذارات الي جت لي من صحابي المتنوترين في الأرض على انهم مثلا شغلوني بمشكلة ولا مفكروش يسألوني ازيك وهما بيهنوني بالعيد أو عرفوا متأخر أني في ألم.. وحزينة جدا اني عايشة في مجتمع أجبرني أن أعلن عن ألمي على الملأ والغاليين عليا والمحبين ليا بالغيب بدون ما اعرفهم يألموا لحالي ويصدموا صدمة ألمي وصدمة عجزهم عن المساعدة..

أنا حزينة جدا أني شاركت ألمي على الملأ.. حزينة للغاية وآسفة للغاية أني آذيت كثيرين جدا غاليين عليا لما يعرفوا كده..

وحانقة على مجتمع دفعني في الاتجاه ده..

حانقة على مجتمع بيدفعني برة الشخص الي بيحب بيته مفتوح لشخص لو طال يختفي هيختفي..

بحب بيتي جدًا..

بس معتقدش بيتي هيحبني أوي بعد ما الكم متر من المطبخ للاوضة شربوا نص النسكافيه بتاعي..

أو يمكن يحبني.. مين عارف..

ربنا يتوب علينا من حياة النسكافيه والمشروبات المسكرة ويرزقنا وطنًا تفوح منه رائحتا الخبيز والقهوة..

يا نوم تعالى.. الليل مش هيقصر عن كده!