بعض الشيء عن كل شيء © Asmaa Khairy

Posts tagged ‘اخوان’

تحبي بيبسي مع الاوردر؟!!!!

أسماء بقت اخوان”

“أسماء بتدافع عنهم”

“بعد كل الي عملوه وقادرة تساعديهم”

“** ** الي فضلنا عارفينهم سنين وفجأة طلعوا اخوان”

“انتي بتدعمي الارهابيين.. بلوك”

“يا اسماء متحاسبيش على مشاريب مش بتاعتك”

في محمد محمود كنت ناقمة على الاخوان، خاصة أهلي منهم لأنهم منزلوش وفضلوا مشككين بسبب معلومات وصلت لبعض القيادات خلت انه النزول مش هيبقى رسمي وانه الي ينزل هيشيل مسؤولية نفسه ..

في محمد محمود مقدموش إدانة صريحة للجيش ولا للرويني ولا اي حد من الي كان ماسك ..

في محمد محمود نزلوا في الاخر حائط بشري سخف ع الناس وليليان وجدي اضربت عشان خاطر الضرب يمشي ..

بعد محمد محمود عملوا جمعة نصرة القدس وكلنا طلعنا عين الي جابوهم عشان خاطر انتو متخيلين ازاي هتنصروا القدس وانتو مش عارفيين تنصروا مصر

في مجلس الوزراء قالوا على الي في الشارع بلطجية ومحامي تبعهم راح قدم بلاغ في هشام يسري وياسر عبد القوي وسامح مش عارفة اسمه ايه بتاع الاشتراكيين الثوريين ..

خالد عبدالله قال ايه الي وداها هناك ..

عكاشة قال هيا ليه مش لابسة حاجة تحت العباية؟ وناس كتير قالوا آمين

وتتوالى الاحداث لدرجة انه في محمد محمود 3 والأحداث الي قبل الاتحادية وقت التحرشات الي كانت بالجملة والاغتصاب الجماعي عبدالله بدر طلع قال انه ده بمزاج البنات

لحد ما حد من اقرب اصحابي جه قالي بصي ده الي بيحصل في التحرير .. انتي لو نزلتي هيعملوا فيكي .. الي بتدافعي عنهم ناس زبالة .. ووجعني وجع خلاني قعدت اكتر من شهر مش قادرة اقوله حتى ازيك

راجع معايا:

في الـ 18 يوم مات حوالي 800 شهيد ..

في عهد العسكر مات حوالي 200 شهيد

في عهد مرسي إجمال الي موات في مواجهات مع الامن تقريبًا 156 حسب توثيق Wiki ثورة

الفترة المش متسمية

(مات 12 قدام مكتب الارشاد .. 22 في بين السرايات و 14 في المنيل.. و4 في اسيوط (واسكندرية معرفش قد ايه مات ولا من انهي فريق) في اشتباكات بين مدنين وبعض مؤيدين ومعارضين الاحداث دي بين 30 يونيو و3 يوليو)

من ساعة ما السيسي مسك:

92 في الحرس الجمهوري

156 في المنصة

حوالي 3000 من فض رابعة (ومازل المصابين بيموتوا)

105 في احداث رمسيس (ومازال المصابين بيموتوا)

و 6 من حركة احرار

(حط الشهداء الميري على جنب؛ توثيقهم وحقهم عند الدولة مش عند المدنين)

احنا بنتكلم في 5000 وزيادة روووووووح !!!!

67 % من الارواح دي ماتو ما بين 3 يوليو والنهاردة ..

يعني كل الي ادفع كووووووم .. والي ادفع في الـ 60 يوم دول كوم تاني خالص!!!!

وقت المنصة والحرس الجمهوري كان العدد المعلن 50 و90 … ارقام عهدت الاخوان كقيادات وحزب قادرين انهم يكملوا مسيرة سياسية وراها.. عشان كده حفاظي على حرمة الدم فصلته عن اي دعم من اي نوع لاي حراك في الشارع … دعمي للناس الي كانت بتموت سواء اي حاجة للمستشفى الميداني زي ما كنا بنعمل بـ #tahrirneeds والتبرعات بالدم او المساعدات للمصابين بالاعلان زي ما طول عمري بعمل عملت .. بس مكنش دعم سياسي..

بعد فض رابعة مفيش اختيار ..

ده النهضة الي كلنا كنا مرعوبين من السلاح الي (اتقال انه ) فيه خصوصًا بعد مقتل هشام البديوي اتفض في ساعتين

رابعة الي مكنش فيه سلاح (والي ناس كتير تبعنا اكدوا انه مفيهوش ريحة السلاح) اشتباكات فضلت لحد الساعة 11 او 12 وبعدين ضرب في المليان وحرق في الخيم وازالة كل حاجة واضرب نار من طيارات على المستشفى .. اسماء صقر ماتت برصاصة عدت من الحيطة مش من شباك .. حرقوا الجثث ..

اعتقلوا الناس .. جرووهم رموهم ع الارض وضربوهم بالطبنجات على ظهرهم داسوا على راسهم برجليهم زي ما كان بيداس على خوذ الامن المركزي في التحرير..

قعدوا شيخ (رجل عجوز) اشيب يربع رجله على الارض ولما نطق قالهم ربنا يسامحكم حسبي الله ونعم الوكيل ضربوه على راسه!!

سيبوا رابعة ..

في مسجد الفتح لما جم يطلعوا المعتقلين ..

كان بيتسيب الناس الي بره ع الناس الي طالعة راجل كان او ست ..

كله كان بيضرب..

كله كان بيتعمل معاه السليمة..

كلهم الجيش ادالهم الامان وكلهم اعتقلوا وقليل منهم اوي الي افرج عنه ميجيبوش 30 نفر..

الاخوان كانوا اسوء ما يكون من محمد محمود ولحد ما محمد مرسي مشي!!

وبعدين يعني؟

أنا الي حاسبتهم كل الوقت ده وكنت بقفلهم بالواحدة عشان مواقفهم اللا اخلاقية والمواقف السياسية الغبية الي تطورت لجنائية في وضع زي الاتحادية ..

أنا الي حاسبتهم كل الوقت ده عشان مبادىء وعشان ثورية وعشان قيم وعشان ميصحش ..

اجي دلوقتي واجيب ورا؟

اجي دلوقتي والجيش بيقتل فيهم هما والي مؤيدين لقضيتهم والي مؤيدين للحق الي وسطهم

طب بلاش .. لو مش معترف انهم بني ادمين يستحقوا الحياة.. لو العنصرية هتستبد بيك وخلاص اي حد بخمار وذقن اطول حبة من الموضة واقل من بتاعة السلفيين .. او اي حد تحس انه “شكله اخوان” بلاش يعيش..

اعمل عبيط واشفع لنفسك بكلمة ادانة..

30 يونيو مش انقلاب.. 30 يونيو حراك شعبي كان هدفه اجراء انتخابات رئاسية مبكرة .. (وبس)

30 يونيو كان حراك شعبي وكان قوي رغم كل رأيي فيه وعدم اتفاقي معاه شكلًا وموضوعًا .. وتشكيكي في تمرد وقرفي منها من اول يوم والي يحب يرجع في التايم لاين هيلاقيها..

3 يوليو بقى.. ده انقلاب .. وعادي مكنش عندي مشكلة معاه في الاول لانه كده كده النظامين زفت .. وكده كده عندنا قضايا هنحارب عشانها .. وعودة مرسي كانت ولا تزال حاجة غير عقلانية بالنسبة لي ولحد فض رابعة كان ممكن يبقى في حل سياسي انه مرسي يعلن انتخابات رئاسية مبكرة وينسحب من المشهد دلوقتي لا..

كان انقلاب ببساطة بيرجعنا للوضع الي كان المفروض يكون من 22 مارس 2011 .. بس طلعت امالي في انه يبقى سيء ساذجة اوي وطلع انه السيسي “وزير الدفاع بنكهة الثورة” سفاح قاتل ومعندوش ذرة احساس

وخلاص طلع زبالة ..

بان انه زبالة

قتل بالالاف مش بالمئات ..

الناس كلها مؤيدين ومعارضين بيقولولي متتفرجيش على تلفيزون!!

يا عالم انا واحدة مبتفتحش تلفيزون .. مبتفحوووووووووش

بكرررررهه .. لانه التلفيزون كله كذاااااااااااااااب كذاااااااااااااااب كذااااااااااااب

مبتفرجش على تلفيزون

انا بقيم حسب الناس الي انا عارفاها والشهادات الحية والفيديوهات والصور واصحابي ..

من اول ابريل 2011 .. وانا مبعرفش اخد معلومة من التلفيزون ومبثقش فيها..

يوم ما افتح بفتح عشان البث الحي .. عشان اشوف ولو جزء من المشهد

بحاول “أتعايش” مع فكرة عدم التعاطف مع الي ماتو ..

بحاول اتعايش مع فكرة انه يجي حد يقبض على جارك فتطلع تزغرط

انه يوم فض رابعة جيران صاحبتي الاخوان طلعوا زغرطوا عشان الاعتصام اتفض..

بحاول اتعايش مع انه عشان “الاخوان باعونا في محمد محمود” عادي انك تبيعهم دلوقتي

عادي انك تعمل كل الي بتحتقرهم بسببه ..

عادي اي حاجة ..

عادي اي مصيبة..

عادي كل حاجة..

من يوم الانقلاب وانا عارفة انه الحياة هتبقى زفت، والصراحة مفكرتش اخد موقف سياسي مع الاخوان ولا ضد العسكر لانه حسيت انه السكوت افضل..لانه مينفعش انصر ده سياسيًا قصاد ده ولا العكس ..

والصراحة براجع نفسي، انه لعله كنت غلط.. وبراجع نفسي مليون مرة هل كنت غلط ولا لا .. وبلاقي كلام قولته كان غلط! وخوفي كان غلط! وحتى سياسيًا موقفي كان لازم يتعدى مجرد ادانة للجيش وتحميله المسؤولية..

قولت يسقط حكم العسكر متأخر المرة دي ..

بس عمري ما رخصت دم حد..

لحد النهاردة الحمد لله مرخصتش دم حد!!

بس عادي انه كل الي اعرفهم يرخصوا دمي انا شخصيًا..

عادي انه فجأة كل الناس وصحابي وناس اشتغلت معاها “ضد مرسي” وتوثيقًا ونيلة ضد مرسي، وناس ضد العسكر من 3 مارس 2011 وما قبلها .. ويقولك اسماء بقت اخوان واشتم في اسماء واسماء دي كذا واسماء دي كذا..

انا اتخنقت..

واسفة اني انفجرت ..

بس والنبي وانتو قاعدين ع البورصة او وسط بعض انتو احرار قولوا الي انتو عايزينه .. الكلام مش بيلزق ..

بس متجوش في وشي وترخصوا دم الناس ..

متجوش على وجعي انا وتدوسوا ..

مش لازم تعرفوني لو مش عايزين .. ومتزعلوش عليا ..

انا راضية ومقتنعة بموقفي تمام الاقتناع ..

ايوة الاخوان غلطوا ..ودفعوا ثمن غلطهم من دم عيالهم ودمهم…

بس انا مش هغلط نفس غلطهم ..

وبلاش نغمة لما الجيش يخلص ع الاخوان نبقى نعارضه.. انتو بالنحاسة الي انتو بقيتوا فيها قصاد الدم مبيقتوش تقدروا تعارضوا نفسكم..

تعارضوا العسكر؟

في رابعة.. ضربوا الناس بالنار.. والي جه ياخد الي مات.. ضربوه بالنار وهو شايله.. جم ناس يحاولوا يسحبوا الجثتين قاموا ضربوا عليهم هما الـ 3 نار… والمشهد اتكرر..

رواية اكتر من حد في اكتر من مكان ..

خليكم كده..

زي ما انتو عايزين ..

سيبوني انا في حالي..

ويا رباب ..

لو روحتي لربنا الاول..

قولي للشهداء انا اسفة ..

ومش محتاجة بيبسي مع الطلب لا……..

وربنا الدم كفاية!!

أسماء خيري

من حرق النهضة

من حرق النهضة

صباح الخير يا مصر

صباح  الخير و الفل و الورد بكل انواعه ، الياسمين و البنفسج يا بلدي يا مصر ، صباح الخير يا بلد الالف مفقود منعرفلهمش طريق ، صباح الخير يا بلد الـ900 شهيد نسيناهم و تاه حقهم في الطريق ، صباح الخير يا بلد الـ19جثة شهيد مجهول ،لا اتكرم ولا اتهنى ، و ادفن جنب شهيد قطر الصعيد ، هو العصر اتغير لأ، خلاص ايه الفرق؟!صباح  الخير يا بلد الـ8000 مصاب عشان تعيشي متعالجوش ،صباح الخير يا بلد الـ2000 شاب فقد عينه عشان ملايين غيره تشوف النور ،و هما بيتخانقو على نبتة اتروت بدمه و دم اخوه ، و سايبين النور مطفي ، صباح الخير ، صباح الخير يا مصر يا وطني ، صباح الخير و يا رب اصبح كل يوم اصبح عليكي ،  و ما اصبحش في يوم و مش الاقيكي …

صباح الايد الواحدة ، اللي مبتصقفش ، صباح العجلة اللي تايهة وسط الصحراء و فاكراها اسفلت ، صباح الخير يا بلد النخبة المنافقة ، صباح الخير يا فلاح بفاسك و حبات عرقك اللؤلؤ ، صباح الخير و سامحنا فرطنا في حقك ، صباح الخير يا عامل في المصنع الفلاني ، و يا باني في المكان العلاني ، و سامحونا ، مشينا ورا النخبة اتاريها ناسياكم ، لكن انتو الاول ، لان بدونكم مفيش مصر ..

صباح الخير يا بلد الشرطة فيكي بتتظاهر ، أيوة بتتظاهر ، بتتظاهر ، عشان تاخد مرتبات أعلى ، و تنزل تفض مظاهرات غيرها من فئات الشعب ، عشان بتطالب  بإزالة ، طبقة صدأ مليانة فساد ، من فوق نفس وطن  معدنه قوي وراقي …

صباح الخير يا وطن ، فيكي اللي اتظلم ظالم ، و بيظلم ، نفسه قبل الكل ، فيكي الناس اللي قامت تقول هتتكلم باسمك ، بتتكلم باسمها هيا ، و يا ريتها بتتكلم بتقول حاجة مفيدة ، لأ ، دي بتتهم غيرها ، و غيرها اللي قال برده هيتكلم باسمك بيتهمها ، وبيدافعو باتهامات و يهاجمو باتهامات ، و ينادو باتهامات ، و تاه اسمك يا وطن ، و تاه صوتك يا وطن ، واللي بجد حقه يتكلم باسمك يا وطن ، مسمعنا السكات …

صباح الخير يا بلد ،عينيك حزنانة ، ما هو انت اصلك شايف في حضنك ثروة تكفي و تفيض ، و رايحين نمد الايد ، لكن يا بلدي الفرق ، انه الايد الممدودة فيها ساعة روليكس و في جيبها مفتاح مرسيدس و بي ام ، و ناسية الايد الممدودة جوة الارض ،وكمها متقطع ، و جلدها مذاقش المية من عمر … و لسه يا بلدي منسية …

صباح الخير يا بلد ، اللي بقى اهله فيه عاملة زي المية و الزيت ، طافي الزيت على المية ، بيكلم بعض ، كاتم على نفس اللي تحت و بيقول مش عارفيين مصلحتهم ، و ناسيين من كام شهر ، لما كان ، فيه دكتاتور كاتم ، نسيو الثورة يا بلدي .. تفتكر ايه هيحصل لما المية تثور ؟

صباح الخير، يا بلد ،كل اللي هم نخبته السلطة و انتخابات ، و ناسيين انه البلد دي بشر ، من لحم و دم ، و دستورها

عايز يعيش كريم بلا اهانة

عايز ياكل اكل نضيف بلا امراض

عايز يتعلم تعليم عدل ينور مش يضلل

عايز ميحسش بالظلم يعيش و لو بحد ادنى من الكرامة ..

عايز يشوف العزيز في البلد دي زيه .. لا بيترفعله قبعة ولا يضربله تعظيم سلام

يفضل زيه كده مواطن

عايز يروح يصلي في الجامع و في كنيسته من غير ما يحس بالخوف لا من شرطي ولا دقن صاحبه

عايز يقعد مع عياله و مش خايف و ينام ع المخدة بالليل باله رايق

عايز يعيش عارف انه يوم ما يتاخد حقه هيرجعله

و الغلطان هيتحاسب

عايز يتنفس هواء نضيف و يشرب مياه نضيفة

عايز يعيش انسان و يشوف بلده في أرقى مكان

عايز يعليها ، و في ايده الطوبة و المونة بس قول ” هيلا هيلا ” هيجي يبنيها

ده دستور بلدنا بجد يا نخبة فرقتينا شمال جنوب و شرق و غرب و فوق و تحت و سلم و حرب ، ده دستورنا أولا يا نخبة ما همك حد .. صباح الخير يا نخبة ، و ايدنا واحدة متتكسرش .. صباح الخير يا نخبة .. انتو لسان و احنا ميدان .. احنا السواعد اللي بجد .. هتبني مصر !!!

صباح الخير ، و اسمحولي افكركم بيوم اتوحدت فيه مشاعر مصر ، و اسمعكم قصيدة عن يوم ميلاد مصر …


تحديث :

 بعد كتابة هذه السطور بسويعات صدر قرار اخلاء  سبيل العمال و الفلاحيين المعتصمين قدام مجلس الوزارء بكفالة 10 الاف جنيه ، و هو مبلغ اعتقد انهم مسمعوش عنه قبل اليوم ، ع العموم فقد تمت الدعوة لوقفة غدا الاثنين 13 يونيو امام مكتب النائب العام للافراج عنهم دون قيد او شرط ، ويبدو اننا نسينا ان هؤلاء هم عماد مصر ، فلما نسيناهم ضاع حقهم

تحديث ثان :

استجاب النائب العام لمطالب الوقفة المذكورة في التحديث الاول و تم اخلاء سبيل المقبوض عليهم بضمان محل اقامتهم

و صباح الخير يا مصر

أسماء خيري

Tag Cloud

%d bloggers like this: